Saıystyń shymyldyǵyn 15 qyrkúıekte Mıhaıl Kýkýshkın men Gvıdo Pelıý ashty. Qos tennısshi arasyndaǵy kezdesý tórt saǵatqa sozylyp, tórt setke deıin oınaldy. Alǵashqy sette ese jibergen jerlesimiz 6:7 (5:7), qalǵan úsh sette qarsylasynan basym tústi. Nátıjesi mynadaı – 7:6 (7:5), 6:2, 6:4. Bul jeńisimen Kýkýshkın (sýrette) quramaǵa alǵashqy upaıdy saldy. Match aıaqtala sala kortqa qazaqstandyq tennısshi Dmıtrıı Popko men argentınalyq Dıego Shvarsman shyqty. О́kinishke qaraı, atalǵan kezdesýde Popko qarsylasyna 6:4, 6:2, 6:2 esebimen ese jiberip qoıdy. Sóıtip, Qazaqstan-Argentına quramalary arasyndaǵy esep teńesti.
Jarystyń ekinshi kúninde tennısshiler juptyq kezdesý ótkizdi. Bul synda Aleksandr Nedovesov pen Tımýr Habıbýlın juby argentınalyq tennısshiler Maksımo Gonsales pen Andres Moltenı dýetine qarsy oınady. Alǵashqy sette qarsylastaryna jol berip qoıǵan otandastarymyz qalǵan úsh sette qaısarlyq tanytyp, argentınalyqtardy 5:7, 6:4, 7:5, 6:4 esebimen jeńdi. Týrnırdiń sońǵy kúninde Mıhaıl Kýkýshkın Dıego Sebastıan Shvarsmanmen synǵa túsip, úsh sette 6:4, 6:4, 7:6 (7:2) argentınalyq tennısshini qapy qaldyrdy. Kýkýshkınniń bul jeńisi tennısten Qazaqstan ulttyq quramasyn Devıs kýbogynyń álemdik tobyna shyǵardy.
Eske sala ketsek, bir ǵasyrlyq tarıhy bar týrnırge Qazaqstan quramasy 1995 jyldan bastap qatysyp keledi. Otandastarymyz álemdik topqa alǵash ret 2010 jyly Shveısarııany jeńgennen keıin shyqty. Sodan beri Qazaqstan quramasy Devıs kýbogynyń álemdik tobyna turaqty qatysýshy atandy. 2011, 2013-15 jyldary shırek fınalǵa deıin jetti. Bul – quramamyzdyń búgingi kúnge deıingi eń úlken jetistigi.
Álı BITО́RE,
«Egemen Qazaqstan»
